Ա. Գեղամյանն  ու  Տ. Ուրիխանյանը չեն սրտնեղում Քոչարյանի խոսքից

 30.11.2013, Իրավունք

Այսպես կոչված քաղաքական տեխնոլոգ Կարեն Քոչարյանը facebook-յան իր էջում փորձել է համեմատական անցկացնել ԱԺ ԲՀԿ խմբակցության պատգամավոր Տիգրան Ուրիխանյանի եւ ՀՀԿ խմբակցության պատգամավոր Արտաշես Գեղամյանի միջեւ: Ծակ պրոֆեսորական վերլուծությունը, ինչ խոսք, օրիգինալ չէր, այն վերաբերում էր Ա. Գեղամյանի երիտասարդական տարիների ելույթներին, իբր թե Տ. Ուրիխանյանը մի քանի տարի անց կնմանվի ՀՀԿ-ական պատգամավորին: Սակայն, արի ու տես, որ Կ. Քոչարյանի խոսքից պատգամավորներն առանձնապես չեն էլ նեղվում, ընդհակառակը` ԱՐՏԱՇԵՍ ԳԵՂԱՄՅԱՆԸ շնորհավորում է Քոչարյանին. «Ես շնորհավորում եմ Կարեն Քոչարյանին, որ իրեն հասու են իմ երիտասարդ տարիներին ունեցած ելույթները եւ դրանց բովանդակությունը: Ինչ խոսք, դա առաջընթաց է, որ 15 տարի անց նա հասկանում է իմ խոսքը եւ այնքան է տպավորվում, որ դրանից հետո թեեւ 13 գիրք եմ գրել, սակայն նա դրանից առաջվա մտքերիցս է դեռ խոսում: Իսկ ինչ վերաբերվում է պոպուլիստներին, ապա պետք է նշեմ, որ նա չարացած մարդ է, որովհետեւ նա քննադատում է եւ ավագ սերնդին, եւ երիտասարդ: Չնայած կարելի է իր հոգեվիճակը հասկանալ, քանի որ, ցավոք սրտի, Քոչարյանը ցանկանում էր քաղաքական վերլուծաբան դառնար` չհաջողվեց, սակայն նայում էր իր դեմքին եւ, հավանաբար, մտքին Վլադիմիր Սոլովյովն էր գալիս, սակայն դա էլ ձախողվեց: Ձախողակին պարզապես հիշեցնենք քաղաքական ռահվիրաներից մեկի խոսքը, որում ասվում էր. «Եթե դու երիտասարդ ես եւ ռադիկալ չես, ապա դա կնշանակի սիրտ չունես, իսկ եթե դու հասուն տարիքի ես եւ պահպանողական չես, կնշանակի` խելք չունես»: Դատելով facebook-յան իր գրառումից, կարող եմ ասել, որ Կարեն Քոչարյանը ոչ սիրտ ունի եւ ոչ էլ խելք, նման մարդկանց հետ բանավեճի մեջ մտնելը` պարապ զբաղմունք է»:

ՍՈՍԵ ՉԱՆԴՈՅԱՆ

 ՏԵՐ-ՊԵՏՐՈՍՅԱՆԻՆ ՈՉ ԹԵ ՔՆՆԱԴԱՏԵԼ, ԱՅԼ ՕԳՆԵԼ Է ՊԵՏՔ

01.11-04.11.2013, Իրավունք 

01.11-02.11.2013, Հայոց աշխարհ

Եվ այսպես, ծանր և երկարատև լռությունից հետո մեր հանրությունն արդեն երկու օր է ըմբոշխնում է Լևոն Տեր-Պետրոսյանի (ԼՏՊ) ոսկեղենիկ հայերենով լույս սպրդած հերթական վերլուծական գոհարը: Ի՞նչ է ավետում «մեծն» Լևոնը, և ինչո՞ւ է հենց հիմա ավետում: Փորձենք նախ վերլուծել նրա կողմից ասվածը, հետո անել հետևություններ:

Ի հակակշիռ ԼՏՊ-ի թիվ 1 եզրահանգման նշեմ, որ նախագահ Սերժ Սարգսյանի հաշվենկատ, սկզբունքային և ծանրակշիռ արտաքին քաղաքականության իրագործման արդյունքում Հայաստանի Հանրապետությունը հայտնվել է բացառիկ մի իրավիճակում, երբ մեր թե՛ Եվրամիության, թե՛ Մաքսային միության գործընկերները կարող են հավատարիմ մնալով իրենց իսկ կողմից ամենաբարձր մակարդակով հնչեցված հայտարարություններին` իրագործել աշխարհաքաղաքական բեկումնային քայլեր, հենվելով մեր երկրի օրինակի վրա: Պարզեմ միտքս: Գաղտնիք չէ, որ Եվրամիության հետ Ասոցացման համաձայնագիրը կոչված էր Հայաստան-Եվրամիություն համագործակցությունը բարձրացնել նոր մակարդակի` խարսխված Եվրամիությանը ներհատուկ ժողովրդավարական, մարդու իրավունքների պաշտպանության, դատական համակարգի կատարելագործման, քաղաքացիական հասարակարգի դերի բարձրացման հիմքի վրա: Ինչ վերաբերում է Եվրամիության հետ խորը և համապարփակ ազատ առևտրի գոտու վերաբերյալ համաձայնագրի ստորագրմանը, որը խոստանում էր Հայաստանի Հանրապետության ՀՆԱ-ի տարեկան առումով 146 մլն եվրոյի հավելաճ, ապա, ինչ խոսք, դա էլ էր կարևոր, սակայն ոչ բախտորոշ մեր երկրի համար: Դրա հետ մեկտեղ, միայն ծույլերը կարող են թերագնահատել այն պատմական որոշումը, որը հնչեցրեց նախագահ Սերժ Սարգսյանը սեպտեմբերի 3-ին Ռուսաստանի Դաշնության նախագահ Վլադիմիր Պուտինի հետ հանդիպման ժամանակ, այն է` որ Հայաստանը ցանկություն է հայտնում անդամակցել Ռուսաստանի, Ղազախստանի, Բելառուսի Մաքսային միությանը: Ուշագրավ է, որ ճիշտ վերջերս  մեր երկրի նախագահի հայտարարությունը գործնական շարունակություն ունեցավ հոկտեմբերի 24-25-ին Մինսկում կայացած Եվրասիական տնտեսական բարձրագույն խորհրդի նիստում, որտեղ քննարկման էր ներկայացվել Մաքսային միությանը և Միասնական տնտեսական գոտուն Հայաստանի Հանրապետության անդամակցության նախապատրաստման վերաբերյալ երեք փաստաթուղթ: Դրանք էին` Մաքսային միությանը և Միասնական տնտեսական գոտուն Հայաստանի միանալու մասին որոշման նախագիծը, Եվրասիական ինտեգրացիոն գործընթացին Հայաստանի մասնակցության մասին հայտարարությունն ու Եվրասիական տնտեսական հանձնաժողովի և Հայաստանի Հանրապետության միջև փոխգործակցության խորացման մասին հուշագիրը:

 ՀԱՅԱՍՏԱՆԻ` ՄԱՔՍԱՅԻՆ ՄԻՈՒԹՅՈՒՆ ՏԱՆՈՂ ՈՒՂՂՈՒԹՅՈՒՆԸ ՎՇՏԱՑՐԵԼ Է ՏԳԵՏ ՈՒ ԱՆՀԱՄԱՐԺԵՔ ԼՈԲԲԻՍՏՆԵՐԻՆ

01.10.2013, Իրավունք

Հայաստանը` հանձին նախագահ Սերժ Սարգսյանի, պաշտոնապես հայտարարել է Մաքսային միություն (ՄՄ) մտնելու ցանկության մասին: Դրանով իսկ վերջակետ է դրվել ինտեգրացիոն ճամփաբաժանի առիթով սկսված անվերջանալի վեճերին, կանխատեսումներին եւ գնահատականներին, ճամփաբաժան, որի առջեւ հայտնվել էր երկիրը:  Եվրոպական  միությունը, իր հերթին, Հայաստանի որոշմանը պատասխանել է նրանով, որ  ԵՄ  ընդլայնման  եւ  հարեւանության քաղաքականության  հարցերով հանձնակատար Շտեֆան Ֆյուլեի միջոցով պաշտոնապես հրաժարվել է «ասոցացվել» Հայաստանի հետ: Դա նշանակում է, որ Հայաստանը, օրինակ, Ալժիրի, Մարոկոյի, Պաղեստինի Ինքնավարության, Թունիսի եւ նման այլ երկրների հետ նույն շարքում չի հայտնվի, որոնք ԵՄ-ի հետ Ասոցիատիվ համաձայնագրի իրենց տարբերակներն են ստորագրել: Համենայն դեպս, Սերժ Սարգսյանի հայտարարությունը եւ ՄՄ մասնակից երկրների պաշտոնական անձանց դրական արձագանքները Հայաստանն աշխարհաքաղաքական մի վիճակից մեկ այլ վիճակ են տեղափոխել: Եթե մինչ այդ բոլորին մտահոգում էր այն հարցը, թե ինչ ինտեգրացիոն նախագիծ է ընտրելու Երեւանը, այսօր քննարկվում է, թե ինչպես առավել արդյունավետ պետք է դարձվի երկրի` ՄՄ մտնելու գործընթացը: Մի կողմ քաշված վիճակում են լոկ հայ եվրաինտեգրատորները, որոնց տնքոցները, լացն ու կոծը, թվում է, վերջ չունեն: Նրանք դժգոհ են եւ ռեւանշ են տենչում, թեեւ նրանց հեռանկարները, անկեղծ ասած, բավական աղոտ են: Իրավիճակը գնահատելու խնդրանքով մեր թղթակիցը դիմել է խորհրդարանում Հայաստանի իշխող Հանրապետական կուսակցության (ՀՀԿ) խմբակցության անդամ, «Ազգային միաբանություն» կուսակցության նախագահ, ԵԱՀԿ Խորհրդարանական վեհաժողովում հայկական պատվիրակության ղեկավար Արտաշես Գեղամյանին: Հարցազրույցում քաղաքական գործիչը հանգամանորեն ներկայացրել է իր տեսակետները տեղի ունեցող անցուդարձի մասին:

«ՍԱ ՈՂՋՈՒՆԵԼԻ ՈՐՈՇՈՒՄ Է ԵՎ ՈՉ ԹԵ ՃՂՃԻՄ ՔՆՆԱՐԿՈՒՄՆԵՐԻ ԱՌԱՐԿԱ ԴԱՐՁՆԵԼՈՒ ԹԵՄԱ»

Իրավունք, 05.09.2013

Երեկ ԱԺ Արտաքին հարաբերությունների մշտական հանձնաժողովի նիստն ընթացավ բավական թեժ պայմաններում: ՀՀ նախագահ Սերժ Սարգսյանի հայտարարությունը, որ Հայաստանը մտադիր է Միանալ Մաքսային միությանը եւ մասնակցել Եվրասիական տնտեսական միության ձեւավորմանը, դարձել էր հանձնաժողովում ընդգրկված ԱԺ պատգամավորների միջեւ լեզվակռվի պատճառ: ԱԺ ՀԱԿ խմբակցության պատգամավոր Նիկոլ Փաշինյանը, «Ժառանգություն» խմբակցության պատգամավորներ Ալեքսանդր Արզումանյանը եւ Թեւան Պողոսյանը կոնֆլիկտի մեջ էին մտել «Ազգային միաբանություն» կուսակցության նախագահ ԱԺ ՀՀԿ խմբակցության պատգամավոր ԱՐՏԱՇԵՍ ԳԵՂԱՄՅԱՆԻ հետ, ումից էլ «Իրավունքը» հետաքրքրվեց միջադեպի մանրամասների մասին.

-Բացարձակ ոչ մի միջադեպ չի եղել: Պարզապես, ես հարկադրված էի բացատրել Հանրապետության նախագահի հայտարարության հետ կապված այն թյուր մեկնաբանությունները, որոնք ուզում էին փաթաթել հանձնաժողովի անդամ առանձին գործընկերներ: Ես ասացի, որ պատմական, բախտորոշ որոշում է ընդունել երկրի ընտրված նախագահը, որը միայն եւ միայն նպատակ ունի երաշխավորել մեր պետականության, մեր երկրի անվտանգությունը: Կարծում եմ , որ սա ողջունելի որոշում է եւ ոչ թե ճղճիմ քննարկումների առարկա դարձնելու թեմա:

- Իսկ ի՞նչ հակափաստարկ էր բերվում Ձեր գործընկերների կողմից:

- Հիմնականում ասում էին անակնկալ էր նման հայտարարություն, ես պատասխանեցի, որ բացարձակապես անակնկալ չի եղել, որովհետեւ վերջերս` եթե հիշողությունս չի դավաճանում օգոստոսի 25-ին, ԱԺ փոխնախագահ Հերմինե Նաղդալյանն իր հարցազրույցում ուղղակիորեն հղում կատարեց թե ԱԺ ՀՀԿ խմբակցության պատգամավոր, ՍԻՄ նախագահ  Հայկ Բաբուխանյանի, թե իմ ելույթներից, որտեղ ասված է, որ իշխող, դոմինանտ հարցը ազգային անվտանգության խնդիրն է: Իսկ ազգային անվտանգության խնդիրը երաշխավորված է ՀԱՊԿ-ով եւ հնարավոր չէ լինել ՀԱՊԿ-ում, բայց  չլինել Եվրասիական միությունում: Նիստի ժամանակ բնականաբար ոչ մի հիմնավոր, տրամաբանական հակափաստարկ չի հնչել եւ չէր էլ կարող հնչել: