ՀՈԴՎԱԾՆԵՐ

ՀԱՅՈՑ ԱՇԽԱՐՀ

ՀԱՅԱՍՏԱՆԻ ԱՐՏԱՔԻՆ ՔԱՂԱՔԱԿԱՆՈՒԹՅԱՆ ԳԼԽԱՎՈՐ ՁԵՌՔԲԵՐՈՒՄԸ

02.03.2012, Հայոց աշխարհ

Նախօրեին կառավարության ընդունելությունների տանը տեղի ունեցավ «Ազգային միաբանություն կուսակցության» նախագահ Արտաշես Գեղամյանի գրքերի շնորհանդեսը, որին ներկա էին հանրապետության նախագահ Սերժ Սարգսյանը, Հայաստանում ՌԴ դեսպանը, մի շարք այլ պաշտոնական անձինք եւ հասարակական գործիչներ

Իր խոսքում Հայաստանում ՌԴ արտակարգ եւ լիազոր դեսպան Վյաչեսլավ Կովալենկոն մասնավորապես նշեց.
«Վերջին ժամանակներս լույս են տեսել պարոն Գեղամյանի հոդվածների երկու՝ «Ապագային ընդառաջ» եւ «Եվրասիական միությունը մեր ապագան է» ժողովածուները։
Առաջինը, որն անմիջապես աչքի է զարնում քաղաքական գործչի՝ բուռն աշխարհաքաղաքական գործընթացների մեջ, որոնցով հագեցած էին 2010 եւ 2011 թվականները, Հայաստանի համար գլխավոր, ճակատագրական իրադարձություններն առանձնացնելն է։ Հենվելով պատկառելի տեղեկատվական եւ ապացուցական հենքի վրա՝ հեղինակն իր հոդվածներում եւ հարցազրույցներում իրեն հատուկ տրամաբանությամբ եւ քաղաքական գործչի, գիտնականի եւ գործնական մարդու համոզչությամբ հիմնավորում է իր գլխավոր թեզիսը, այն է՝ վերջին երկու տարում Հայաստանի արտաքին քաղաքականության գլխավոր ձեռքբերումը Ռուսաստանի եւ Հայաստանի ռազմավարական գործընկերության հետագա խորացումն է։
Չի կարելի չհամաձայնել հեղինակի այն եզրահանգմանը, որ Հայաստանի արտաքին քաղաքական ոլորտի հաջողությունները մեծապես պայմանավորված են 2010թ. օգոստոսին Հայաստանի Հանրապետություն Ռուսաստանի Դաշնության նախագահ Դմիտրի Մեդվեդեւի եւ 2011թ. հոկտեմբերին Հայաստանի նախագահ Սերժ Սարգսյանի Ռուսաստան կատարած պետական այցերի արդյունքներով եւ այդ արդյունքների հիման վրա ընդունված երկկողմ միջպետական համաձայնագրերով։
Պրոֆեսիոնալ մակարդակով վերլուծելով Հայաստանի տնտեսության վիճակը, մատնանշելով տնտեսության վրա համաշխարհային ֆինանսատնտեսական ճգնաժամի թողած բացասական հետեւանքները՝ Արտաշես Գեղամյանը, հենվելով պաշտոնական վիճակագրական հենքին, հետեւողականորեն ընթերցողին բերում է այն եզրահանգման, որ Ռուսաստանի, Ղազախստանի եւ Բելառուսի հետ Հայաստանի տնտեսական ինտեգրումը կարող է լայն հնարավորություններ բացել երկրների դինամիկ զարգացման, համաշխարհային ֆինանսատնտեսական ճգնաժամի հաղթահարման, համաշխարհային տնտեսության հետագա ցնցումների հետեւանքներից պաշտպանության համար։

Կարդալ ավելին...

ՊՈԵԶ ՔՇԻ, ՊՈԵԶ, ՊԵՐՈՆԻ ՍԱՇԻԿ ՏԻԳՐԱՆ ԿԱՐԱՊԵՏՈՎԻՉ

28.02.2012, Հայոց աշխարհ

Մարդ որ տգետ ու մեծամիտ է լինում, դեռ ոչինչ: Բայց երբ իր այդ եւ էլի մի քանի «գովելի» հատկանիշները հեռուստաեթերով ինքնագոհ սփռում է ամբողջ երկրով մեկ, երբ ինքն իրեն իրավունք է վերապահում սեփական խակ գաղափարներն ու մանկամիտ եզրահանգումները գնահատել որպես խորիմաստ մտքեր ու դրանցով եթերից խրատել հեռուստադիտողին, այստեղ ո՞նց չհիշես Վարդան Այգեկցու առակը`

Քեզ ով կարգեց մեր գլխին քահանա,

Մենք քեզ կով գիտենք...

Նա, որ իրեն մտավորական է համարում ու իր օգտագործած հայերեն բառերի մի զգալի մասը կիսատ է արտասանում կամ դրանց փոխարեն բառանման, մոտավոր, հազախառն հնչյուններ է բերանից բաց թողնում (որովհետեւ չգիտի, թե այդ բառը ինչպես պետք է ճիշտ արտասանել) ու այդ մակարդակով էլ անտաղանդ, անկապ, նախադպրոցական տարիքի երեխաներին հատուկ հանգավորումներով բանաստեղծություններ է գրում, դրանցով մինչեւ վերջերս հեռուստաեթերում անթաքույց հիանում ու հետո էլ տպագրում, այստեղ ո՞նց չասես` պոեմ գրելու փոխարեն պոեզ քշի պերոնի Սաշիկ այ Տիգրան Կարապետովիչ, դա քեզ մոտ ավելի լավ է ստացվում:

Այստեղ չես կարող չհիշել 60-ական թթ. Երեւանի պատմությանը քաջատեղյակ մարդկանց ասածը, թե այնուամենայնիվ գրպանահատությունը ոմն պերոնի Սաշիկի մոտ ավելի լավ էր ստացվում: Այնպես որ մի փորձիր կաշվիցդ դուրս գալ: Այսքանն էլ ոչինչ. բա որ սա որոշեց, թե Հայաստանի քաղաքական դաշտն առանց իրեն պակաս է ու սկսեց քաղաքականությամբ զբաղվել...

Եվ այսպես պերոնի Սաշիկը սկսեց քաղաքականությամբ զբաղվել...

Սկզբում ԱԼՄ էր հրավիրում ընդդիմադիրներին, նրանց հետ բանավեճ կազմակերպում ու եթերից ցույց տալիս իշխանություններին, թե որքան է նրանց սիրում ու պաշտում: Հետո, տեսնելով, որ իշխանություններին իր տափակ գովերգությունները դուր չեն գալիս, ավելին, դրանք հակառակ ազդեցություն են թողնում հեռուստադիտողի վրա, իրեն հռչակեց կենտրոնամետ (ինչ-որ տեղ լսել էր ցենտրիստ բառը, բայց հո չգիտեր, թե դա ինչ է նշանակում):

Այստեղ էլ ձախողվեց` զգալով, որ իր բռնած այս դերից նույնպես խելքը բան չի կտրում, իրեն հայտարարեց ընդդիմադիր, հետո էլ՝ թե չէ, ես ոչ մի բան էլ չեմ, ես ժողովրդական մարդ եմ, ու, քյորօղլու օրինակով, «գնաց դեպի ժողովուրդը», սկսեց գյուղից գյուղ շրջել, քաղաքից քաղաք, բայց շուտով ուղեղի մեծ լարումից հետո հասկացավ, որ իր ցնդաբանություններով մարդկանց չի կարողանում խաբել:

Հիասթափվեց չգնահատված տրիբունը ու նորից անցավ մարդկանց հետ եթերից հաղորդակցվելուն: Ի՞նչ եք կարծում, ի՞նչն էր պատճառը: Ուղղակի Տիգրան Կարապետովիչը գյուղերում ունեցած հանդիպումների ժամանակ նկատել էր, որ իրեն միայն կանայք են ծափահարում, որովհետեւ նրանց ձեռքերն ազատ էին, քանի որ հասկանալի պատճառով պայուսակները տանն էին թողնում, իսկ տղամարդիկ, նույնպես ոչ առանց պատճառի ձեռքները գրպաններում էին պահում...

Կարդալ ավելին...

«ԵՎՐԱՍԻԱԿԱՆ ՄԻՈՒԹՅՈՒՆԸ ՄԵՐ ԱՊԱԳԱՆ Է»

(ԱՐՏԱՇԵՍ ԳԵՂԱՄՅԱՆԻ ժողովածուների շնորհանդեսին ընդառաջ)

23.02.2012, Հայոց աշխարհ

Ընթերցող հասարակայնությունը վերջերս լավ նվեր ստացավ. Նրա սեղանին է դրված «Ազգային Միաբանություն» կուսակցության նախագահ Արտաշես Գեղամյանի հոդվածների, ելույթների, հարցազրույցների նոր, հերթական` իններորդ հատորը` «Եվրասիական միությունը մեր ապագան է» վերնագրով:

Այն ընդգրկում է 2011 թ. փետրվար-դեկտեմբեր ընկած ժամանակահատվածում հանրապետության տարբեր պարբերականներում եւ Ռուսաստանի Դաշնային Regnum հեղինակավոր տեղեկատվական գործակալության կայքէջում տպագրված ավելի քան վեց տասնյակ հոդված ու հարցազրույց` 444 էջ ծավալով: Այս հատորը փաստորեն նախորդ ժողովածուների տրամաբանական եւ օրգանական շարունակությունն է: Այս աշխատությանն անդրադառնանք փոքր-ինչ ծավալուն:

Ժողովածուում Ա.Գեղամյանն իրեն հատուկ պատասխանատվության մեծ զգացումով եւ մանրազնին քննարկում-վերլուծում-գնահատում է ընդգրկուն, բազմապիսի ու բազմաթիվ հիմնահարցեր: Արդեն իսկ ժողովածուի խորագրերը բացահայտում են հեղինակի լայն մտահորիզոնը: Գրքում զետեղված որ նյութն էլ վերցնենք, կտեսնենք իրողությունների եւ փաստերի առատ ընդգրկում ու դրանց յուրովի մեկնաբանում, բնութագրեր եւ գնահատականներ, որոնց անհնար է չհամաձայնել, քանի որ դրանք անաչառ քաղաքագետի սթափ պատգամներն են` հասցեագրված լայն հասարակայնությանը:

Ժողովածուի նյութերի փաստական, աղբյուրագիտական հարուստ, բովանդակալից պատումը բարձրացել է գիտավերլուծական մակարդակի:

Քաղաքագիտական վերլուծություն կատարող յուրաքանչյուր ոք անկասկած պետք է նկատի ունենա դրա տեսական բոլոր անդրադարձները: Ըստ այդմ` խնդրո առարկա ժողովածուում ընդգրկված նյութերը նվիրված են Հայաստանի Հանրապետության տնտեսության ներկա վիճակին, ազգաբնակչության սոցիալական դրությանը, Լեռնային Ղարաբաղի հիմնախնդրի խաղաղ կարգավորմանը, տարածաշրջանում եւ, ընդհանրապես, մեր երկրի միջազգային հեղինակությանը, հայ-թուրքական հարաբերությունների կարգավորմանը, Մեծ Մերձավոր Արեւելքում ծավալվող իրադարձությունների վերլուծությանը եւ բազում այլ հարցերի: Հարցեր, որոնք, պայմանավորված ներկա ժամանակաշրջանում տարածաշրջանային նոր զարգացումներով, ձեռք են բերում քաղաքական, գործնական եւ արդիական հնչեղություն:

Չխորանալով հիշյալ հիմնահարցերի քննարկման բովանդակային կողմի մեջ` նշենք, որ հեղինակը հանրագումարում իրավացիորեն համարում է, որ աշխարհաքաղաքական միանգամայն նոր պայմաններում Հայաստանի անկախության ամրապնդումը կենսական անհրաժեշտություն է:

Ուշադիր ընթերցողը կնկատի մեր երկրի ռազմաքաղաքական հիմնախնդիրների, մասնավորապես հայ-ռուսական համակողմանի համագործակցության այսօրվա հրամայականով պայմանավորված ընդհանրական ու կենսական շահերն ամեն ինչից վեր դասելու շեշտադրումները: Ա. Գեղամյանն իրավամբ համոզված է, որ հայ-ռուսական ռազմավարական հարաբերությունների խորացումը մեզ համար պատմական անհրաժեշտություն է եւ հայոց պետականության ամրապնդման երաշխիք:

Կարդալ ավելին...

ԱՌԱՋԱՐԿՈՒՄ ԵՆ ՀԱՆՐԱՔՎԵ

13.01.2011, Հայոց աշխարհ

«Ազգային Միաբանություն կուսակցության» համոզմամբ անհրաժեշտ է, որ բոլոր կուսակցությունները, շահագրգիռ կազմակերպությունները, ինչպեսեւ հանրապետության նախագահին կից Հանրային խորհուրդը համամասնական-մեծամասնական ընտրակարգերի վերաբերյալ ներկայացնեն իրենց առաջարկներն ու հիմնավորումները եւ Սահմանադրական դատարանի անմիջական եզրակացությամբ ձեւակերպեն համապատասխան հարցեր, որոնք եւ կդրվեն համաժողովրդական քննարկման` հանրաքվեի ձեւով, ինչը կարելի է կազմակերպել ԱԺ ընտրությունների հետ միաժամանակ»,- ասում է ԱՄԿ փոխնախագահ ԱԼԵՔՍԱՆ ԿԱՐԱՊԵՏՅԱՆԸ։