ԹՅՈՒՐ ՊԱՏԿԵՐԱՑՈՒՄ

18.06.2013, Հայոց աշխարհ

ՀԱԿ խմբակցության քարտուղար Արամ Մանուկյանը իշխանությունը համեմատեց բուրգի հետ, որտեղ բոլորը պառկած են, բացի խախտումների եւ չարաշահումների հիմնական պատասխանատուից, որը տնօրինում է մյուսների ճակատագիրը։ Անգամ մտավախություն հայտնեց, թե վարչապետին ուզում են քավության նոխազ դարձնել։

Այս կապակցությամբ ԱՐՏԱՇԵՍ ԳԵՂԱՄՅԱՆԸ «Հայոց Աշխարհ»-ի թղթակցին ասաց. «Արամ Մանուկյանը եռանկյունաչափության մասին թյուր պատկերացումներ ունի։ Բուրգը, որպես կառույց, ամենակայուն, անսասան կառույցն է, որտեղ բոլորը կանգնած են. եթե պառկեն, բուրգը կփլվի։ Այդ տեսակետից, համեմատությունը անհեթեթ է։

Ինչ վերաբերում է մտավախություններին, թե փորձում են քավության նոխազ դարձնել վարչապետին, նման կարծիք կարող են հայտնել միայն նրանք, ովքեր միտված են կոծկելու թերությունները, դրանով իսկ թուլացնելու նույն վարչապետին։ Ցանկացած քննարկում, որտեղ, հատկապես բարեկամների կողմից, վեր են հանվում թերություններն ու բացթողումները, մի նպատակ են հետապնդում՝ ուժեղացնել թույլ կողմերը։

ՀՀԿ խմբակցության իմ գործընկերների քննադատական ելույթները միայն եւ միայն այդ համատեքստում եմ տեսնում։ Կարծում եմ, այլ մոտեցում չէր կարող լինել։

Ավելին՝ գաղտնիք չէ, որ ՎՊ հաշվետվությունը պատրաստ էր ամիսներ առաջ եւ հասու էր բոլորին՝ ե՛ւ իշխանական, ե՛ւ ընդդիմադիր ուժերին։ Քաղաքական մեծամասնությունը դրանից հետո է նշանակել վարչապետին եւ ձեւավորել կառավարությունը՝ համարելով, որ այս կառավարությունն ի զորու է այդ թերությունները վերացնել։

Միգուցե Ա.Մանուկյանը ծանոթ չէ այս ժամանակագրության հետ, դրա համա՞ր է նման հետեւություններ արել։ Կամ գուցե, որպես վարչապետի համերկրացի, կարծում է, որ Տիգրան Սարգսյանն իր եւ ՀԱԿ-ի պաշտպանության կարիքն ունի»։

ԵՐԵՎՈՒՅԹԸ ԹՈՂԱԾ՝ ՊԱՅՔԱՐՈՒՄ ԵՆ ՀԵՏԵՎԱՆՔՆԵՐԻ ԴԵՄ

18.06.2013, Հայոց աշխարհ

Մեր զրուցակիցը ՀՀԿ խորհրդարանական խմբակցության անդամ, «Ազգային միաբանություն» կուսակցության նախագահ ԱՐՏԱՇԵՍ ԳԵՂԱՄՅԱՆՆ է

-Ինչպե՞ս եք գնահատում Վերահսկիչ պալատի հաշվետվության շուրջ քննարկումները։

-Ամենայն ուշադրությամբ հետեւելով քննարկումներին՝ խիստ դրական եմ գնահատում, որ զեկուցողներին՝ ՎՊ նախագահին եւ փոխվարչապետին, հարց տալու համար հերթագրվել էր 45 պատգամավոր։ Սա նշանակում է, որ ներկայացված փաստաթուղթն իրոք մտորումների տեղիք է տալիս, եւ Ազգային ժողովը, հատկապես քաղաքական մեծամասնությունը, շահագրգիռ է մանրակրկիտ քննարկելու եւ հասկանալու, թե ինչ է կատարվում այդ բնագավառում։

Դրական պետք է գնահատել նաեւ այն, որ Վերահսկիչ պալատը ճիշտ հետեւություններ է արել հանրապետության նախագահ Սերժ Սարգսյանի հարցադրումներից եւ ուղիղ հանձնարարականներից, որոնք հնչել էին թե՛ ՀՀԿ վերջին համագումարում, թե՛ ԱԺ ընտրությունների նախաշեմին, թե՛ նախագահական ընտրություններից առաջ՝ առ այն, որ այսուհետ էլ ավելի է խստացվելու պայքարը բոլոր տեսակի կոռուպցիոն դրսեւորումների դեմ։

-Այս օրերին մամուլում եւ քաղաքական շրջանակներում արծարծվող հիմնական հարցերից մեկը հետեւյալն է՝ չարաշահումների հեղինակները, ի վերջո, պատասխանատվության կենթարկվե՞ն, թե՞ այս անգամ էլ կխոսենք, կքննադատենք, կանցնի՝ կգնա։

-Բոլորը, չգիտես ինչու, կենտրոնացել են այդ հարցի վրա՝ ինչո՞ւ այդ ամենին չի տրվում իրավական գնահատական, ինչո՞ւ ՎՊ հաշվետվությունը չի ուղարկվում դատախազություն։ Ընդդիմադիր պատգամավորուհու կողմից անգամ իսկ հարց բարձրացվեց, որ դատախազությունը պետք է դա ընդունի որպես հայտարարություն հանցագործության մասին, այն դեպքում, երբ դատախազությունն իրավասություն չունի բանավոր քննարկումների հիման վրա քրեական գործ հարուցել։

Հակահեղափոխությունը Հայաստանում այլևս չի անցնի

28.02.2013, Հայոց աշխարհ

27.02.2013, Իրավունք

Սույն թվականի փետրվարի 21-22-ին Վիեննայում տեղի ունեցավ ԵԱՀԿ Խորհրդարանական Վեհաժողովի ձմեռային 12-րդ նստաշրջանը: Այս նստաշրջանի առանձնահատկությունը կայանում էր նրանում, որ դրա ընթացքում ի թիվս այլ  հարցերի քննարկվեցին նաև հունիս-հուլիսին Ստամբուլում կայանալիք ԵԱՀԿ Խորհրդարանական Վեհաժողովի հիմնական զեկուցման հետ առնչվող հարցեր: Ուշադիր լսելով և վերլուծելով Թուրքիայի և Ադրբեջանի պատվիրակների կողմից հնչեցված հարցադրումները տպավորություն ստեղծվեց, որ ադրբեջանա-թուրքական կողմը նախաձեռնել է քարոզչական  լայնածավալ արշավ: Նրանց  ելույթների առանցքն էր կազմում այն գաղափարը, որ Հայաստանը իր գործողություններով հրահրում է ապակայունություն մեր տարածաշրջանում: Կարճ անդրադարձ կատարեմ ադրբեջանական պատգամավորների ելույթներում հնչած երկու-երեք հարցադրումներին (իմ արձագանք ելույթները տեղադրված են Ազգային Միաբանություն կուսակցության կայքում՝ http://amiab.am/, ինչպես նաև կրճատումներով հրապարակվել են մամուլում).

- Սիրիայում, Հյուսիսային Աֆրիկայում  և Սախելում ընթացող զարգացումների հնարավոր վտանգավոր հետևանքները կանխելու շուրջ քննարկումների ժամանակ Ադրբեջանի պատգամավորը նշել էր, որ Ստեփանակերտի  օդանավակայի շահագործմանը միտված  հայկական կողմի գործողությունները ոչ այլ ինչ են, քան սադրանք Հայաստանի կողմից և Ադրբեջանը չի հանդուրժելու դա և վնասազերծելու է Ստեփանակերտի օդանավակայանից թռչող ցանկացած ինքնաթիռ: Նման հայտարարություն անելով նա ակնկալում էր լսել զեկուցող Վիլիա Ալեկնայտե-Աբրամիկենեի գնահատականը:

ԱՊԱՀՈՎ ՀԱՅՐԵՆԻՔԻ ՀԵՆՔԸ ԱՊԱՀՈՎՎԱԾ ԸՆՏԱՆԻՔՆ Է

08.02.2013, Հայոց աշխարհ

Քաղաքական յուրաքանչյուր գործիչ, առավել ևս մտավորական քաղաքացի ` հանրապետության համար ճակատագրական այս օրերին, երբ ՀՀ նախագահական ընտրություններին շատ կարճ ժամանակ է մնացել, չի կարող անտարբեր լինել: Տարածաշրջանում ստեղծված աշխարհաքաղաքական լարված իրավիճակը, երկրի առջև ծառացած արտաքին ու ներքին մարտահրավերները պարտավորեցնում են բոլորիս լինել աչալուրջ, անաչառ և իրատես, ճիշտ և օբյեկտիվ գնահատել ՀՀ նախագահի թեկնածուների նախընտրական ծրագրերը: Ուստի պարտքս եմ համարում մեր հայրենակիցներին և ընտրողներին ներկայացնել ՀՀ գործող նախագահ և ՀՀ նախագահի թեկնածու Սերժ Ազատի Սարգսյանի «Դեպի ապահով Հայաստան» վերնագրով նախընտրական ծրագրի որոշ դրույթների վերաբերյալ իմ ընկալումներն ու մեկնաբանությունները:

Սկսեմ նրանից, որ ՀՀ նախագահ և նախագահի թեկնածու մեծարգո Սերժ Սարգսյանի նախընտրական ողջ ծրագիրն ամենից առաջ ուղղված է ապահով հայրենիք ունենալու նպատակին, հայրենիք, որի կայունության, անվտանգության և զարգացման կարևորագույն հենքը ապահովված ընտանիքն է: Այո՛, հազարամյակների փորձություն անցած ամուր հայ ընտանիքը մեր կարևորագույն արժեքն է: Եվ պատահական չէ, որ նախընտրական ծրագրի սոցիալական ոլորտը ներկայացված է «Սոցիալապես պաշտպանված ընտանիքներ» վերնագրի տակ: