Սահմանին լարվածության սրացումը ԵՏՄ-ի հետ ոչ մի կապ չունի. Արտաշես Գեղամյան

08.08.2014, News.am

Սահմանին լարվածության սրացումը ոչ մի կապ չունի Հայաստանի՝ Եվրասիական տնտեսական միությանն անդամակցելու հետ: NEWS.am-ի հետ զրույցում նման կարծիք հայտնեց «Ազգային միաբանություն» կուսակցության նախագահ, ԱԺ ՀՀԿ խմբակցության պատգամավոր Արտաշես Գեղամյանը:

«Ուկրաինայում եւ նրա շուրջ լարված իրավիճակ է, տարբեր ուժեր պարզապես ցանկանում են Թուրքիայի միջոցով իրավիճակը շիկացնել Հարավային Կովկասում, որպեսզի Ռուսաստանին դուրս մղեն տարածաշրջանից»,- ասաց նա:

Արտաշես Գեղամյանի խոսքով՝ երկու նախագահների հանդիպումից հետո ինչ-որ բան կփոխվի, եթե Ադրբեջանին ողջամտությունը չդավաճանի. «Եթե նա երաշխիքներ է ստացել իր վաղեմի բարեկամ Թուրքիայից, որ ճիշտ ժամանակն է սրել իրավիճակը Հայաստանի եւ Ադրբեջանի միջեւ՝ հաշվի առնելով, որ Հայաստանի ռազմաքաղաքական դաշնակից Ռուսաստանը հիմա լուրջ խնդիրների առջեւ է կանգնած՝ կապված Ուկրաինայի հետ, ապա այստեղ կարող է արկածախնդրություն դրսեւորեն: Բայց մենք պիտի զինվենք համբերությամբ՝ համոզված լինելով, որ Ադրբեջանի հիստերիան ապացուցում է, որ արջը վախից է բղավում, բայց դա արջ էլ չէ, արնախում տարր է: Եթե Ադրբեջանը արկածախնդրություն չդրսեւորի, ապա լարվածությունը գնալով կմեղմվի եւ սեպտեմբեր-հոկտեմբերին կողմերը դուրս կգան ավելի լուրջ բանակցային գոտի»:

Նշենք, որ Հայաստանի եւ Ադրբեջանի նախագահների հանդիպումը նախատեսվում է օգոստոսի 9-ին Սոչիում:

ԵԱՀԿ ԽՎ-ում պատվիրակության ղեկավար.  Բաքվում Ռանկո Կրիվոկապիչի գլխին պարզապես «սարքելեն»

18.04.2014, News.am

ԵԱՀԿ ԽՎ-ում ՀՀ պատվիրակության ղեկավար, Ազգային ժողովի ՀՀԿ խմբակցության պատգամավոր Արտաշես Գեղամյանն ընդգծել է ղարաբաղյան հիմնախնդրի կարգավորման վերաբերյալ Բաքվում հնչած հայտարարությունների ոչ կոմպետենտ լինելը:

NEWS.am-ի հետ զրույցում մեկնաբանելով ադրբեջանական լրատվամիջոցների հրապարակումներն ԱՀ այցի եւ Միլի Մեջլիսի խոսնակ Օքթայ Ասադովի հետ հանդիպման ընթացքում ԵԱՀԿ ԽՎ-ի նախագահ Ռանկո Կրիվոկապիչի հայտարարությունները` Արտաշես Գեղամյանը նշել է.

«Հատկանշական է, որ Միլի Մեջլիսի խոսնակ Օքթայ Ասադովը եւ ԵԱՀԿ ԽՎ-ի նախագահ Ռանկո Կրիվոկապիչը համաձայնել էին, որ ղարաբաղյան հիմնախնդրի կարգավորումը պետք է հիմնված լինի այսպես կոչված «ԵԱՀԿ Լիսաբոնյան սկզբունքների» վրա, որոնք հնչել էին 1996 թ. դեկտեմբերին` ԵԱՀԿ անդամ պետությունների գագաթաժողովում,  եւ համալրված Մադրիդյան սկզբունքների հիման վրա:  Սա հատկանշական է նրանով, որ այսպես կոչված լիսաբոնյան սկզբունքներում մի կետ կար նշված, եթե չեմ սխալվում,  համար 20-ը, որտեղ նշված էին ղարաբաղյան հիմնախնդրի կարգավորման պայմանները` միանգամայն անընդունելի հայկական կողմի համար:  Եվ դա Հայաստանի այն ժամանակվա նախագահ Լեւոն Տեր-Պետրոսյանի կողմից այդ կետի վրա վետո կիրառելու պատճառ էր դարձել:  Իսկ մենք գիտենք, որ ԵԱՀԿ գագթաժողովներում բանաձեւերն ընդունվում են համաձայնության հիման վրա:  Նշանակում է` այդ կետը հանվել էր Լիսաբոնի բանաձեւից:  Ի պատասխան Հայաստանի նախագահի վետոյի` այն ժամանակվա նախագահ Հեյդար Ալիեւը հանդես էր եկել հայտարարությամբ, որ ղարաբաղյան հիմնախնդրի վերաբերյալ այդ կետը չընդունելու դեպքում ինքը վետո է կիրառում ամբողջ բանաձեւի վրա, ինչպես եւ արեց:  Նշանակում է`  իրականում որպես պաշտոնական փաստաթուղթ «լիսաբոնյան սկզբունքները» գոյություն չունեն. այն չէր ընդունվել: 

Հայկական կողմը ԵԱՀԿ ԽՎ նստաշրջանին մասնակցելու հարցը կլուծի ելնելով քաղաքական նպատակահարմարությունից. Պատվիրակության ղեկավար

17.04.2014, News.am

Հայկական կողմը Բաքվում կայանալիք ԵԱՀԿ ԽՎ նստաշրջանին մասնակցելու վերաբերյալ իր դիրքորոշումը կհստակեցնի ելնելով քաղաքական նպատակահարմարությունից: Այս մասին NEWS.am-ի թղթակցի հետ զրույցում նշեց ԵԱՀԿ ԽՎ-ում հայկական պատվիրակության ղեկավար Արտաշես Գեղամյանը՝ հավելելով, որ մինչեւ հունիսի 28-ը շատ ժամանակ կա:

Նրա խոսքով՝ հայկական կողմը կհետեւի ադրբեջանցի պատգամավորների գործողություններին եւ հայտարարություններին, կվերլուծի Ադրբեջանի նախագահ Իլհամ Ալիեւի ելույթները, որն, ի դեպ, օրերս հերթական ռազմաշունչ ելույթն է ունեցել:

«Իսկ մինչ այդ մենք  կհամադրենք ելույթներն ու հետեւություններ կանենք»,-ասել է  Գեղամյանը:

Արտաշես Գեղամյան. Վարչապետը ու երկրորդ նախագահը մեկ թիմի անդամ են

13.01.2014, News.am