ՀԱՆԴԻՊՈՒՄ ԱԺ-ՈՒՄ

23.07.2015, Հայոց աշխարհ

Երեկ Ազգային ժողովում տեղի ունեցավ ԵԱՀԿ Խորհրդարանական վեհաժողովում Հայաստանի պատվիրակության հանդիպումը ԵԱՀԿ Ժողովրդավարական հաստատությունների եւ մարդու իրավունքների գրասենյակի (ԺՀՄԻԳ) տնօրեն Միխաել Գեորգ Լինկի գլխավորած պատվիրակության հետ:

Հանդիպման ժամանակ հանգամանալից քննարկվեցին Հայաստանում ժողովրդավարական հաստատությունների կայացմանը, մարդու իրավունքների պաշտպանությանը վերաբերող խնդիրներ: Առանձնահատուկ ուշադրություն դարձվեց սահմանադրական փոփոխություններին առնչվող հարցերին:

Հայաստանի պատվիրակության անդամներ Ստեփան Դեմիրճյանը եւ Ստեփան Մարգարյանը իրենց տեսակետները հայտնեցին քննարկվող հարցերի վերաբերյալ: Վերջում ելույթ ունեցավ մեր պատվիրակության ղեկավար, ՀՀԿ խմբակցության անդամ Արտաշես Գեղամյանը:

Մ.Գ.Լինկը պատրաստակամություն հայտնեց աջակցել առաջիկայում ընդունվելիք՝ երկրի համար կարեւորագույն փաստաթղթերի արդիականացմանը, մասնավորապես Ընտրական օրենսգրքի կատարելագործմանը:

 ՀԱՅԱՍՏԱՆԸ ՀԱՆԴԵՍ ԵԿԱՎ ՈՐՊԵՍ ԻՆՔՆԻՇԽԱՆ, ԺՈՂՈՎՐԴԱՎԱՐԱԿԱՆ ԵՐԿԻՐ

14.07.2015, Հայոց աշխարհ

Նախորդ շաբաթ Հելսինկիում գումարված ԵԱՀԿ ԽՎ նստաշրջանը բավական թեժ անցավ, լրատվամիջոցների արձագանքները, մեկնաբանությունները նմանապես բուռն էին, երբեմն՝ հակասական։ Բանը հասավ նրան, որ ԽՎ-ում հայաստանյան պատվիրակության ղեկավար Արտաշես Գեղամյանին մեղադրեցին Ադրբեջանի ջրաղացին ջուր լցնելու՝ նրանց հեղինակած բանաձեւին կողմ քվեարկելու համար։

 Ինչի՞ մասին է խոսքը, ի՞նչ է կատարվել իրականում՝ մեր հարցերին ի պատասխան, մանրամասնում է ՀՀԿ խորհրդարանական խմբակցության անդամ, «Ազգային միաբանություն» կուսակցության առաջնորդ ԱՐՏԱՇԵՍ ԳԵՂԱՄՅԱՆԸ։

 -Եթե նայեք իմ ելույթները (դրանք տեղադրված են թե՛ մեր կուսակցության կայքում՝ www.amiab.am, թե՛ ԵԱՀԿ ԽՎ պաշտոնական էջում), կհամոզվեք՝ մարդ պետք է կա՛մ հոգեկան հիվանդ լինի, կա՛մ չարակամ՝ նման անհեթեթ պնդումներ անելու համար։

   Եկեք-տեսեք, որ իմ ելույթները խառնեցին շատերի խաղաքարտերը՝ նրանց, ովքեր ամիսներ շարունակ փորձում էին ՌԴ քաղաքական իշխանություններին ներշնչել, որ Հայաստանը վստահելի դաշնակից չէ։ Ավելին՝ լուրեր էին տարածում, թե ՀՀ քաղաքական ղեկավարությունը «խաղեր է տալիս» Եվրամիության հետ Արեւելյան գործընկերության շրջանակներում՝ վկայակոչելով Ռիգայի գագաթաժողովում ձեռք բերված պայմանավորվածությունը, առ այն, որ մոտ ժամանակներս ԵՄ-ը կհաստատի իր թիմի մանդատը՝ Հայաստանի հետ բանակցություններ սկսելու ասոցացման նոր համաձայնագրի տեքստի շուրջ։

Հելսինկիում քննարկման էր դրված վեհաժողովին Ռուսաստանի պատվիրակության մասնակցության խնդիրը եւ բազմաթիվ այլ հարցեր՝ մեր դաշնակցի հետ կապված, բանաձեւերի նախագծեր, այլ երկրների կողմից ներկայացված փաստաթղթերում առաջարկվող ուղղումներ, որ ներկայացրել էր Ռուսաստանի պատվիրակությունը մինչ վեհաժողովի մեկնարկը։ Եվ հանկարծ այդ բոլոր փաստաթղթերին տեր է կանգնում Հայաստանի խորհրդարանի Հանրապետական խմբակցության պատգամավոր Արտաշես Գեղամյանը, մինչդեռ շատ-շատերը, որոնք պիտի որ պաշտպանեին դրանք, բերանները ջուր առած՝ լռում էին։

 Ի՞ՆՉՆ Է «ՏՐԱՔԱՑՐԵԼ» ՉՈՒԶՈՂՆԵՐԻՆ

14.07.2015, Հայոց աշխարհ

«Հելսինկիում գումարված ԵԱՀԿ ԽՎ նստաշրջանի ամբողջ իմաստը հանգում է նրան, որ Հայաստանը, հավատարիմ լինելով թե՛ իր դաշնակցային պարտավորություններին, թե՛ ԵՄ հետ ԱլԳ շրջանակներում ձեռք բերված պայմանավորվածություններին, հանդես եկավ որպես ինքնուրույն, ինքնիշխան, ժողովրդավարական նորմերով առաջնորդվող երկիր։

 Դրա վառ ապացույցը եղավ այն, որ Հայաստանի դիրքորոշումն ամբողջությամբ համընկնում էր Ֆրանսիայի եւ Շվեյցարիայի դիրքորոշումների հետ։ Ի՞նչ է՝ որեւէ մեկը Ֆրանսիային, Շվեյցարիային կամ Իտալիային կարո՞ղ է մեղադրել ավտորիտարիզմը պաշտպանելու մեջ։

Դա էլ է «տրաքացրել» չուզողներին»,- մեր թղթակցին ասաց ԱՐՏԱՇԵՍ ԳԵՂԱՄՅԱՆԸ։

 ՌՈՒՍԱՍՏԱՆԻՆ ՍԱՏԱՐԵՑԻՆ ՄԻԱՅՆ ՀԱՅԵՐԸ

08.07.2015, Հայոց աշխարհ

Նախօրեին Ֆինլանդիայի մայրաքաղաք Հելսինկիում տեղի է ունեցել ԵԱՀԿ Խորհրդարանական վեհաժողովի լիագումար նստաշրջանի բացումը` նվիրված Հելսինկյան ակտի 40-ամյա հոբելյանին:

Ռուսաստանի պատվիրակությունը, սակայն, բոյկոտել է վեհաժողովի նստաշրջանը, քանի որ ֆիննական իշխանությունները թույլ չեն տվել Պետդումայի խոսնակ Սերգեյ Նարիշկինին մուտք գործել Ֆինլանդիա եւ մասնակցել վեհաժողովի աշխատանքներին: Վերջինիս նկատմամբ Եվրամիության կողմից պատժամիջոցներ են սահմանված:

Սա պատճառ է դարձել, որ ռուսական պատվիրակությունը բոյկոտի ԵԱՀԿ ԽՎ աշխատանքները: Մինչդեռ նիստում նախատեսված է եղել մի շարք հակառուսական փաստաթղթերի քննարկում:

ԵԱՀԿ Խորհրդարանական վեհաժողովում Հայաստանի պատվիրակության ղեկավար, «Ազգային միաբանություն» կուսակցության նախագահ ԱՐՏԱՇԵՍ ԳԵՂԱՄՅԱՆՆ իր ելույթի  ժամանակ անդրադարձել է ռուսական պատվիրակության բացակայության հարցին` նշելով, որ ԵԱՀԿ Խորհրդարանական վեհաժողովին անդամակցող երկրներից միայն 27-ն են ԵՄ-ի անդամ, իսկ մնացած 30-ը չեն մտնում այդ կազմակերպության մեջ։ Հետեւաբար ստացվում է, որ Եվրամիությունը միանձնյա որոշում է կայացնում այն երկրների փոխարեն։