«ԿԵՆՏՐՈՆ» ՀԵՌՈՒՍՏԱԸՆԿԵՐՈՒԹՅԱՆ «ՈՒՐՎԱԳԻԾ» ՀԱՂՈՐԴԱՇԱՐԻ ՀՅՈՒՐԸ  «ԱԶԳԱՅԻՆ ՄԻԱԲԱՆՈՒԹՅՈՒՆ ԿՈՒՍԱԿՑՈՒԹՅԱՆ»

ՆԱԽԱԳԱՀ ԱՐՏԱՇԵՍ ԳԵՂԱՄՅԱՆՆ Է

(4 հուլիսի 2011թ.)

Պետրոս Ղազարյան – Բարի երեկո, եթերում «Ուրվագիծն» է: Եվ, այսպես, սիրելի հեռուստադիտողներ, այսօր զրուցելու ենք «Ազգային Միաբանություն կուսակցության» նախագահ Արտաշես Գեղամյանի հետ, նրան կարող եք ուղղել ձեր հարցերը: Զրույցը սկսում ենք մեր ներքաղաքական, հասարակական կյանքի ամենակարևոր, ամենահրատապ թեմաներից: Բարի երեկո, պարոն Գեղամյան:

Արտաշես Գեղամյան – Բարև Ձեզ:

Պ.Ղ. – Շնորհակալություն, հրավերն ընդունելու համար: Ընդհանրապես, շոգ եղանակին ճի՞շտ է քաղաքական լուրջ զրույցներ վարելը:

Ա.Գ. – Իսկ ըստ Ձեզ, եղանակի հետ կապված զրույցները կարող են լուրջ և թեթևսոլիկ լինե՞լ:

Պ.Ղ. – Իհարկե:

Ա.Գ. – Լուրջ մարդը տարվա չորս եղանակին էլ լուրջ է խոսում, ծանծաղ մարդն էլ ծանծաղ բաներից է խոսում: Շնորհակալություն հրավերի համար: Սիրով կաշխատեմ Ձեր և մեր հեռուստադիտողներին հուզող հարցերին գիտելիքներիս ներածին չափով պատասխանել:

Պ.Ղ. – Պարոն Գեղամյան, մի քանի ամիս առաջ պարոն Սարգսյանը, եթե չեմ սխալվում, Ծաղկաձորում էր, հայտարարեց, որ մայիս, հունիս, հուլիս ամիսներին ամեն ինչ կարվի, որպեսզի սոցիալական վիճակը մեղմվի, գնաճը զսպվի և Կառավարությանը հանձնարարեց, որ սա լինի առարկայական, այսինքն` մարդը պետք է զգա այդ գնաճի անկումը: Ու նաև ասաց, որ ովքեր կթերանան, նրանք արդեն  պետք է զգան իրենց վրա պատասխանատվություն և հետևանքներ այդ թերացումների համար: Զգո՞ւմ է արդյոք քաղաքացին այդ արդյունքները:

Ա.Գ. –  Եթե ապավինենք պաշտոնական վիճակագրությանը, ապա, ավա~ղ, այսօր քաղաքացին դա չի կարող զգալ այն պարզ պատճառով, քանի որ սպառողական գների անկում չի արձանագրվել: Վերջերս ՀՀ Ազգային վիճակագրական ծառայությունը (ԱՎԾ) հրապարակեց սպառողական գների ինդեքսը Հայաստանի Հանրապետությունում 2011 թ. հունվար-հունիս ամիսներին (այսինքն` առաջին կիսամյակում) և եթե մենք դա համեմատում ենք նախորդ տարվա առաջին կիսամյակի հետ, ապա տեսնում ենք, որ սպառողական գների ինդեքսը կազմել է 109.9 %: Դրա հետ սպառման ապրանքների ինդեքսը կազմել է 112.1 %, պարենային ապրանքներինը` 116.2  %, ծառայություններինը` 105 %:

Պ.Ղ. – Մայիսից առաջ չէ, ես հարցնում եմ մայիսից հետո:

Ա.Գ. –  Ես դա էլ ասում եմ, առաջին կիսամյակում, որն իր մեջ ներառել է թե՛ մայիս և թե՛ հունիս ամիսները: Այսինքն` այն ժամանակաշրջանը, որի մասին արդարացիորեն խոսում էր Հանրապետության Նախագահը Ծաղկաձորի իր ելույթում և հստակ խնդիրներ էր դրել մեր Կառավարության ֆինանսատնտեսական բլոկի, նաև Կենտրոնական բանկի առջև: Թվում էր` գործնական այդ հարցադրումներից հետո Կառավարությունը Կենտրոնական բանկի հետ պետք է առնվազն ձեռնամուխ լինեին մանրակրկիտ վերլուծելու, թե որոնք են Հայաստանի Հանրապետությունում ամսեամիս աճող գնաճի  պատճառները: Քանզի մինչև տնտեսական տվյալ հիվանդության պատճառը չիմանաս, բուժում չես կարող նշանակել, ճի՞շտ է: Սակայն մենք խնդրո առարկայի վերաբերյալ վերլուծություն բացարձակապես չտեսանք: Մինչդեռ գնաճն ունի իր խորքային պատճառները, որոնք պայմանավորված են ոչ միայն և ոչ այնքան դրամավարկային քաղաքականությամբ, որի միջոցով Կենտրոնական բանկն այսօր փորձում է զսպել գնաճը, այլև տնտեսության ընդերքում ընթացող մակրոտնտեսական գործառույթներով:

Պ.Ղ. – Եվ…

Ա.Գ. – Եվ, պարզաբանեմ:

Պ.Ղ. – ԱՎԾ –ի այլ տվյալներով չասիք, որ մեր տնտեսությունը գրեթե 10 % աճ է տվել, էլ չեմ ասում արդյունաբերությունը: Ծիրանն էլ ավելի էժան է, քան անցած տարի, պարոն Գեղամյան, և ավելի շատ է: Подробнее...