ԱՆԻ ՊԱՊՅԱՆ

Սանկտ-Պետերբուրգի արտաքին տնտեսական կապերի ինստիտուտի 3-րդ կուրսի ուսանողուհի, ԱՄԿ Երևանի «Բաղրամյան 2» տարածքային կազմակերպության անդամ

Սիրելի մայրեր, քույրեր, ընկերուհիներ, շնորհավորում եմ բոլորիդ այս գեղեցիկ գարնանային տոնի կապակցությամբ:

Լեցուն դահլիճը վկայությունն է այն փաստի, թե որքան անդամ և համակիրներ ունի «Ազգային Միաբանություն կուսակցությունը» հայ կանանց շրջանում: Ես արդեն երկու տարի է, ինչ կուսակցության անդամ եմ և այսօր այս դահլիճում եմ, քանզի երազում եմ, որ մեր երկրում շուտափույթ կատարվեն դրական այնպիսի տեղաշարժեր, որ արդեն հաջորդ գարնան տոնին ամեն մի հայ տղամարդ հնարավորություն ունենա գոնե մեկ ծաղիկ նվիրել իր սիրած կնոջը:

Այսօր ես այս դահլիճում եմ, որովհետև ցանկանում եմ, որ ոչ մի ուսանողի ծնող այլևս սարսափով չսպասի կիսամյակային վարձի մուծման վերջնաժամկետին, այլ իր արժանապատիվ աշխատանքով հնարավորություն ունենա հոգալ զավակի ուսման ծախսերը:

Այսօր ես այս դահլիճում եմ, որովհետև փափագում եմ, որ ոչ մի հայ կին այլևս չմեկնի չակերտավոր արտագնա աշխատանքի՝ ստիպված լինելով այդ ճանապարհով ապահովել ընտանիքի գոյությունը:

Այսօր ես այս դահլիճում եմ, քանզի վստահ եմ, որ Հայաստանը պիտի դառնա իսկապես ժողովրդավարական և ազատ երկիր, որտեղ իմ ապագա զավակներն ապրելու են երջանիկ ու ապահով կյանքով:

Այսօր ես այս դահլիճում եմ, որովհետև հավատում եմ «Ազգային Միաբանությանը» և նրա առաջնորդ Արտաշես Գեղամյանին և համոզված եմ, որ միայն այս ուժն է ընդունակ մեր երկիրը հանել այս ծանր, ողբերգական վիճակից և կերտել ազատ ու բարգավաճ Հայաստան:

Կրկին՝ շնորհավո՛ր: