ԱՐՏԱՇԵՍ ԳԵՂԱՄՅԱՆ. ՍԱՄՎԵԼ ԲԱԲԱՅԱՆԸ ՆՍՏԱԾ ԺԱՄԱՆԱԿ ԵԶԱԿԻ ՄԱՐԴԿԱՆՑԻՑ Է ԵՂԵԼ, ՈՐԻՆ ՊԱՇՏՊԱՆԵԼ ԵՄ ԵՎ ԵՐԲԵՔ ՉԵՄ ՀՐԱԺԱՐՎՈՒՄ

09.06.2016, Ժողովուրդ 

«Ազգային Միաբանություն կուսակցության» նախագահ, այսօր Ազգային ժողովում ՀՀԿ խմբակցության պատգամավոր Արտաշես Գեղամյանը 1999–2003 թվականներին եղել է ԱԺ «Իրավունք և Միաբանություն» խմբակցության ղեկավարը: «Ժողովուրդ»-ը զրուցեց Արտաշես Գեղամյանի հետ:

– Պարոն Գեղամյան, օրեր առաջ ԱԺ արտաքին հարաբերությունների մշտական հանձնաժողովը դրական եզրակացություն տվեց «ՀՀ և ՌԴ միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրին: Ըստ Ձեզ՝ որքանո՞վ է այդ համաձայնագիրը բխում մեր շահերից:

– Հայաստանը և Ղարաբաղը գտնվում են դե ֆակտո պատերազմական իրավիճակում: Չգրված օրենք կա. պատերազմական իրավիճակում՝ լինի դա հրամանագիր, համաձայնագիր, պայմանագիր, որոնք այսպես թե այնպես բխում են պաշտպանության բնագավառի շահերից, անվերապահորեն պետք է օր առաջ ընդունվեն՝ առանց հրապարակային լայն քննարկումների: Որովհետև կան համապատասխան հարցադրումներ, որոնց մասին հրապարակավ խոսելը նույնն է, ինչ մեծ նվեր մատուցել ադրբեջանա-թուրքական գլխավոր շտաբի հետախուզական վարչություններին: Եթե այս համաձայնագիրը հավանության է արժանացել երկրի Գերագույն գլխավոր հրամանատարի կողմից, ուրեմն մենք պետք է օր առաջ այն վավերացնենք և դրանով մեր սատարումը դրսևորենք ի լուր աշխարհի, որ, այ´ո,  մենք անվերապահորեն վստահում ենք երկրի թե՛ բարձրագույն իշխանությանը, թե՛ ռազմական իշխանություններին: Համաձայնագրի վավերացումը սթափեցնող որոշում կլինի, սթափեցնող դերակատարում կունենա ադրբեջանա-թուրքական բազեների համար, այն սառը ցնցուղ կլինի:

– Պարոն Գեղամյան, Դուք եղել եք ԱԺ «Իրավունք և Միաբանություն» խմբակցության ղեկավարը, Սամվել Բաբայանի համակիրը: Հիմա նա կրկին Հայաստանում է, հանդիպե՞լ եք նրան:

 – Վերջին անգամ 6–7 տարի առաջ եմ հանդիպել. միջոցառում էր, եթե չեմ սխալվում՝ 2008 թվականին ՀՀ Նախագահի երդման արարողության ժամանակ հանդիպեցինք, բնականաբար, որպիսությունը հարցրեցի, նա էլ՝ իմը: Դա է եղել վերջին հանդիպումը: Ձեր ակնարկը ես հասկանում եմ, այո՛, Սամվել Բաբայանը, երբ կալանավորված էր, ես եղել եմ քաղաքական այն գործիչը, որը հրապարակայնորեն պաշտպանել է նրան: Ինչ վերաբերում է նրա վերջին հայտարարություններին, ես ի լուր հանրապետության ասեմ, որ ցանկացած հարցի քննարկում, որը շոշափում է պաշտպանության բանակի (ԼՂՀ-ի – խմբ.) գործունեության մասնագիտական նրբերանգներ, եթե դրանք ռացիոնալ են, և եթե հրապարակային են, ապա այդքան վատ է մեզ համար: Որովհետև մենք, այո՛, հետևություններ կանենք, բայց հետևություն կանի նաև թուրքական գենշտաբի անալիտիկ կենտրոնը, որը համարվում է ՆԱՏՕ-ի անալիտիկ լավագույն կենտրոններից մեկը և կփորձի դրան հակաթույն մշակել՝ ի չիք դարձնելով մեր հնարավոր գործողությունները: Ուստի, բոլոր տեսակի ռազմական, պաշտպանական հարցերին վերաբերող մասնագիտական այդ նեղ, բանիմաց առաջարկները հրապարակելը, ըստ իս, անընդունելի է, ում կողմից էլ, որ դա լինի:

Սա է իմ տեսակետը, որից ես երբեք չեմ հրաժարվի, ինչպես չեմ հրաժարվում նրանից, որ Սամվել Բաբայանը բանտում նստած ժամանակ եզակի մարդկանցից է եղել, որի հետ այդքան մոտ չլինելով, ինչքան հանրապետության երկրորդ նախագահն էր, այո,՛ պաշտպանել եմ հրապարակավ:

– Կարծես թե Սամվել Բաբայանը ցանկություն ունի մտնել քաղաքականություն: Նրան լավ ճանաչելով՝ որտե՞ղ եք տեսնում առաջիկա զարգացումներում, ո՞ր դաշտում:

– Եթե ինքը իրեն չի տեսնում, ես ո՞նց կարող եմ տեսնել: Ինքը իր հնարավորություններն ավելի լավ գիտի, քան ես և Դուք:

– Պարոն Գեղամյան, ինչո՞ւ Սերժ Սարգսյանը նրան չի ընդունում, չի լսում Բաբայանին: Ի վերջո, Սարգսյանն անգամ Լևոն Տեր-Պետրոսյանին այցի գնաց՝ անտեսելով մինչ այդ եղած լրջագույն քաղաքական տարաձայնությունները, մինչդեռ Բաբայանի նկատմամբ մի տեսակ թշնամանք է նկատվում, ինչո՞ւ:

 – Ես գիտեմ հետևյալը. ՀՀ Նախագահը վեհանձն անձնավորություն է, եթե նա կանգնում է կոնդեցիների հետ, որոնց տները քանդել են, հանգիստ զրուցում է, հանձնարարականներ է տալիս, նույնը ցանկացած մարդու հետ կանի: Կարծում եմ՝ իր երբեմնի կոլեգայի հետ կզրուցի, եթե պատշաճ ձևակերպվի խնդրանքը, իսկ եթե պատշաճ ձևով խնդրանքը չի ձևակերպվում, այլ երանգներով է մատուցվում, բնականաբար, արժանանում է համարժեք մոտեցման:

– Դուք լինելով փորձառու քաղաքական գործիչ՝ կարո՞ղ եք ասել՝ Բաբայանի կողմնակից Հայկ Խանումյանի ծեծը ո՞վ էր կազմակերպել և ինչո՞ւ:

– Եթե դու կարողանաս պատճառներն ասես, ուրեմն դու պետք է ծեծողների հոգեբանության մակարդակի լինես: Բարեբախտաբար, ես այդ մակարդակից շատ հեռու եմ: Ես կարող եմ միայն ասել, որ դա հարված էր ԼՂՀ-ի՝ որպես ժողովրդավարական երկրի իմիջին, ինչը շատ նրբին հաշվի էին առել ԼՂՀ Ազգային ժողովում ընդգրկված բոլոր խմբակցությունները, որոնք համատեղ հայտարարությամբ հանդես եկան: Դա չէր բխում ԼՂՀ-ի բուն շահերից, այն էլ այս իրավիճակում:

– Ի՞նչ տեղեկություններ ունեք Բաբայանի կուտակած պարտքերի մասին: Հայտնի է, որ նա տարիներ առաջ այստեղ մեծ պարտքեր կուտակեց ու հեռացավ երկրից:

-Այդ Դուք գիտեք, ես նրա ֆինանսական վիճակի մասին տեղեկություն չունեմ, իրենից հետաքրքրվեք:

ԱՐՓԻՆԵ ԹՈՎՄԱՍՅԱՆ

Последние видеоматериалы

Новые книги